သီတင်းကျွတ်(၀ါကျွတ်)လားဗျာယ်၊ သိတော့သိလိုက်ယင့်၊ ဒေနိန့်ဝါကျွတ်နိန့်လို့။ AASYC ရုံးမှာ အလှူပီးလို့ ရခိုင်မုန့်တီနှစ်ခွက်တောင် အားပီးပလိုက်သိရေ။ မုန့်တီအရသာကိုတော့ခံစားလိုက်ရယင့်၊ ယေကေလေ့ ၀ါကျွတ်ဆိုရေ ပျော်ရွှင်မြူးထူးမှုအရသာကိုကား ဖမ်းစားလို့မရ ရင်ထဲမှာကွက်လပ်တခုပိုင် ဟာနိန်လီဗျာယ်။ ဟာဖို့နန့်ရာ ကိုယ့်ရွာ ကိုယ့်ဒေသ ကိုယ့်တိုင်း ကိုယ့်ပြည်ကမဟုတ်၊ နိန်ရထိုင်ရစွာတောင် လွတ်လွတ်လပ်လပ်မဟိ၊ ဗုဒ္ဓဘာသာဆိုကေလေ့ ထိုင်းနိုင်ငံမှာကတမျိုးထော၊ ၀ါကျွတ်ကို ကောင်းကောင်းတန်ဖို့မထားကတ်၊ တိတ်လို့ ဆိတ်လို့ လူမသိ သူမသိဖြစ်နိန်စွာကိုတွိရရေ။ တန်ဆောင်မုန်းလပြည့်ရို့သင်္ကြန်ရို့ကတော့ခါ ကကောင်းစည်စွာရာမနမ်း၊ ယေကေလေ့ အကျွန်ရို့ပျော်ရွှင်မှုတိက လီဆောင်ရာအ၀ီးမှာ မိဝီးဖ၀ီး တိုင်းပြည်နှင့်အ၀ီးမှာ ပစောင်ပျော်ဖို့လဲ၊ ကျွတ်တေ၀ါမှာမပျော်၊ ပျော်ရေ၀ါကအ၀ီးမှာ ယင်းဝါကျွတ်ကိုမှန်းဆက်ယင်း ညဥ့်ကုန်လားစွာရာအဖတ်တင်ရေ။ ကြည့် အကျွန်ရို့ဖက်မှာ ၀ါကျွတ်လရောက်ကေ မိုးကလေ့အင်အားပျော့်ညံ့လို့ ဒုတိယကမ္ဘာစစ်မှာ တဆုတ်တည်းဆုတ်လာရရေ ဂျပန်စစ်တပ်ပိုင် စုန်လီနန့် ငွီနှင်းမှုန်ချေတိက မဟာမိတ်တပ်တိပိုင် တက်ညီလက်ညီထိုးစစ်ဆင်လာကတ်တေ၊ ရွှီဝါရောင်စပါးခင်းတိက စုန်လီနန့်ယိမ်းနွဲ့ပျော်ပါးဖို့ ငွီနှင်းစက်ချေတိကိုသောက်သုံးဖို့ အဆင်သင့်။ အနောက်ယွန်းလာရေ နီမင်းကြီးကလေ့ အကောင်းဆုံးပန်းချီကားတိကို ခင်းကျင်းပြသလို့။ တနိန်ရာမှာတော့ခါ လမင်းကြီးနန့်ကြယ်ပေါင်းစုံရို့ အလှပဆုံးညည့်ကမ္ဘာကို ဖန်တီးဖို့တိုင်ပင်လို့ဟိလီယင့်။
တောဖေါက်ကေရို့ဦးဆောင်ရေ လူပျိုခေါင်းဆောင်အဖွဲ့ကလေ့ ရွာဦးကျောင်းက ကျောင်းထိုင်ဆရာတော် ဦးဇောတိကကို စည်းစည်းလုံးလုံးနန့် အပျိုလူပျို ဆရာကန်တော့ဖို့ပျင်ဆင်လို့ ရွာလယ်ကကွင်းပြင်မှာ စုစုရုံးရုံးရောက်နိန်ဗျာယ်။ ဘန်ဒါပင်ထက်မှာတင်ထားရေ လော်စပီကာကလေ့ ငြိမ်းညောင်းသာယာရေ ခိုင်ကျော်လင်း၏ ၀ါကျွတ်ပွဲတော်ကိုဖွဲ့ဆိုထားရေ သခြင်းချေတိနန့် မောင်သာဘန်းရို့ မင်းကျွန်ပျိုတစုကလေ့ မီးပုံးပျံတင်ဖို့စီစဉ်လို့။ ယင်းပိုင်ကြည်နူးပျော်ရွှင်စရာကောင်းရေ အခါသမယ၀ါကျွတ်နိန့်ကို အကျွန်မလွမ်းပဲနိန်ဖို့လားယေ။ အ၀ီးရောက်ရခိုင်သူရခိုင်သားတိုင်းလေ့ လွမ်းကတ်ဖို့ထင်ပါယင့်။
ကိုယ့်ပြည်ကို ကိုယ်ချစ်တေလူမျိုး၊ အမျိုးဘာသာကို စောင့်ထိန်းရေလူမျိုး၊ ကိုယ့်ရိုးရာယဉ်ကျေးမှုပွဲတော်တ်ိကို လွမ်းကတ်ဖို့နန့်ရာ။ ဇာလောက်လွမ်းကတ်ရေလဲဆိုကေ မြောက်ဦးခေတ် ဘုရင်မင်းရာဇာကြီးလက်ထက်မှာ အိမ်ရှိစံမင်းခမောင်းကြီးကို ပဲခူး(ဟံသာဝတီ) နိုင်ငံတော်ကိုစစ်ချီဖို့ စေလွှတ်လိုက်တေခါ မင်းခမောင်းကြီး၏ အထိန်းတော်(အကြီးတော်) စာဆိုသျှင်ဥက္ကာပျံလေ့ ပဲခူးမှာလေးနှစ်ခန့်နိန်ရရေခါ ဥက္ကာပျံယေ မြောက်ဦးမြို့တော်က ၀ါကျွတ်လပွဲတော်ကို အောက်မွိတမ်းတလို့ လွမ်းရရေအကြောင်း ဒေပိုင်ယှောင်ဖွဲ့ဆိုထားပါရေ။
ဝါကျွတ်သည်၊ ဆန်းလတ်ခါ-
လူ့ရွာပွဲသဘင်၊ ဆီမီးတန်းဆောင်
ပန်းထောင်ထီးကြီးပျင်၍
သင်ပုန်းတင်၊ တန်းပြခတ်
အဌသီနှင့် ပဉ္စသီကို
အညီစောင့်သုမ်းမှတ်၍
ဒါန၀တ် စွန့်ကြဲလှူ
မင်းပွဲသဘင်၊ မြို့ပြင်တချို့လူက
သီဇာဟူ သောက်ပြွန်းပြွန်း
ကောင်းမှုလက်ဆောင်
ထမင်းထောင်ကိုဝန်း၍
အံ့ဖွေမှုအသံချို
လက်ခုတ်ဖြောက်ဖြောက်
ခြင်းကောက်သံပြိုင်ဆို၍
အလိုလိုသောသောရု၊ ၀ါကျွတ်သဘင်
ပျော်မှုဆင်သည်၊ လူရှင်အစုစုနှင့်
ယစ်ဝမှုအွအံကာ
တချို့ကိုလည်း တချို့ဆဲသည်
တချို့ရို့က ရန်ခိုက်ရှာ၍
တချို့သာ ပြစ်တင်ကုန်
ပိန်ပေါက်ခရာ၊ စည်ဒုပါနှင့်
ပတ်သာမြို့ လုမ်းချုံမျှ
ကခြီမူပတ္တလား၊ စောင်းညှင်းပြီသာ
တူရိယာသည်
လူ့ရွာသဘင်များနှင့်
တသောသောထမင်းထောင်
လှိုင်ကူထွတ်ထား
ဘုရားပါးရောက်အောင်တည်း
ကြိုးဆောင်သည်အစုစု
သာဓုကြံကြံ၊ နေ့မညံသည်
အသံတရုရုနှင့်
ရွှင်ပျော်မှုအသွယ်သွယ်လို့ ရာဇဌာနီ မြောက်ဦးရွှေမြို့တော်ကြီးတွင် သီတင်းဝါကျွတ်ပွဲတော်ကို ရည်ရော်မှန်းဆက်ယင်း အလွမ်းပိုခပါရေ။ ပြန်ချင်ကေလေ့ မပြန်နိုင် တိုင်းပြည်အတွက် တာဝန်ထမ်းဆောင်ခရေ စာဆိုသျှင် ဥက္ကာပျံယေ ဇာလောက်ထိ ကိုယ့်ရိုးရာ ကိုယ့်လူမျိုး၊ ကိုယ့်တိုင်းပြည်ကို ချစ်ရေဆိုစွာကို သိရပါရေ။ အမှန်ဆိုကေ မြန်မာရို့၏ ပဲခူးမြို့တော်မှာလေ့ အလားတူ ၀ါကျွတ်ပွဲတော်ကို စည်ကားသိုက်မြိုက်စွာ ပြုလုပ်ပျော်ရွှင်ကတ်ပါရေ။ ယေကေလေ့ ဥက္ကာပျံကား မပျော်နိုင်၊ မျိုးမတူရေတိုင်းတပါးမှာ ဥက္ကာပျံအတွက် ပျော်ရွှင်စရာမဟိ၊ အဖရခိုင်နိုင်ငံတော်ကို တသသလွမ်းတ ပူဆွေးနိန်ရေ စာဆိုကြီးဥက္ကာပျံပါယေ။
အဂုလည်းအကျွန်ရို့မှာယင်းပိုင်ဗျာယ်။ ကိုယ့်ပြည်ကိုယ့်ရွာကို ပြန်ချင်ကေလေ့ မပြန်နိုင်။ အ၀ီးကရာမှန်းဆက်လို့ အလွမ်းပိုကတ်ရပါရေ။ စာဆိုလျှင်ဥက္ကာပျံကြီးရို့ခေတ်နန့် အကျွန်ရို့ခေတ်ကလုံးဝမတူပါ။ စာဆိုရသျှင်ကြီးရို့ခေတ်က ရခိုင့်နိုင်ငံတော်ကြီးသည် ဘုန်းမီးနီလ အထွန်းတောက်ဆုံးအချိန်၊ ပြန်လာကေလေ့ ကိုယ့်ပြည်ကိုယ့်ရွာက နွီးထွီးမှုနှင့်ကြိုဆိုပြီးသား။ အကျွန်ရို့ခေတ်ကား ကျွန်သဘောက်ခေတ် ရခိုင်ဆိုစွာကိုတောင် ကမ္ဘာကမသိ၊ မြန်မာနယ်ချဲ့ရို့၏ ဖိနှိပ်မှုအောက်မှာ ပြာပူထဲရောက် ငါးချေတကောင်ပိုင် နှလုံးသားထဲက အမှန်မြတ်နိုးလို့ ကိုယ့်ပြည်ကိုလွမ်းကတ်ရကေလေ့ ပြန်ချင်သူကယှားပါရေ၊ အနိုင်ကျင့်၊ဗိုလ်ကျ၊ ဖိနှိပ်၊ရက်စက်၊ သွီးနှော၊ လူမျိုးရေးမုန်းတီးမှုနန့် ရခိုင်ကို ကမ္ဘာမြီပြင်ပေါ်မှာ မကျန်ရအောင် ပုံစံအမျိုးမျိုးနန့် ဖျောက်ပစ်နိုင်အောင် ကြိုးစားနိန်ရေ မြန်မာနယ်ချဲ့ရို့ လက်အောက်က အသက်လုထွက်ပြီး တိမ်းယှောင်လာကတ်စွာလေ့ တနိန့်တနိန့်လက်ရွီချိုးလို့မရနိူင်ရေ ဦးရေ၊ တိုင်းပြည်မှာ နို့သောက်၊ ဒုတ်ထောက်၊ မိမတိရာ မလားနိုင်လို့ကျန်ကတ်ဖို့။
တဖက်ကကြည့်ကေလေ့ ယင်းအ၀ီးရောက်ရခိုင်သားရို့ရေ စုစည်းညီညွတ်မှုမဟိ၊ ဖောင်ကွဲဝါးအလား တပြည်တရွာမှာဝမ်းစာရှာလို့ လမ်းပျောက်သူပျောက်၊ တချို့လေ့ အိမ်မှာကျန်ခရေမိသားစုအတွက် တခုလေ့မကူညီနိုင်၊ မထောက်ပံ့နိုင်၊ ကိုယ်ကိုတိုင်ကမတည်မြဲ၊ နွီရာသီရွက်ကျင်ချေတိပိုင် ဆန္ဒမပါလီဆောင်ရာမှာ၊ ပြည်ပရောက်တရားမ၀င်အလုပ်သမားဘ၀နန့် လူ့အခွင်ရေး၊ အလုပ်သ္မားအခွင့်အရေးဆိုစွာက သူရို့နန့်မဆိုင်၊ မခံချင်ရေစကားလုံး မြောက်များစွာအောက် မျိုးဂုဏ်မှိန်လို့ ရခိုင်လူမျိုးပါလို့ ပြောကေတောင်သူရို့မသိ။ နိန်ရာတကာမှာအနှိမ်ခံ၊ ယေကေလေ့ အကျွန်ရို့ရခိုင်သားတိက ဇာလုပ်ရဖို့လဲ အဖြေကို အဂုထိမသိကတ်သိ။ အလွမ်းကိုရာ သံသရာရှည်သလောက်ဆွဲဆန့်လို့ ကိုယ့်လူမျိုးအချင်းချင်းဆိုကေ ဗိုလ်မထား၊ သည်းခံခွင့်လပ်မှုမဟိ၊ အောင်ပွဲဟူသမျှရေ စုစည်းညီညွတ်မှုလက်ထဲမှာဟိရေဆိုစွာကို နားမလည်ကတ်သိ။ ကံကြမ္မာကို အပြစ်တင်ဖို့စွာကိုသိရေ၊ ဖိနှိပ်မှုကို တော်လှန်ဖို့စိတ်မဟိသိ၊ ခေတ်ကိုအပြစ်ပြော ရန်သူကိုမိတ်ဆွေလို့ယုံမှား ခြီရာပျောက်လို့ ရီနောက်နိန်ကတ်တုန်း။ ကိုယ့်တိုင်းကိုယ့်ပြည်ကို ရန်သူလက်ထဲထိုးအပ်လို့ ကိုယ်ရို့တိုင်းတပါးကို ထွက်ပြီးရရေအဖြစ်ကို ရင်နာကတ်ပါဖိ. တော်လှန်ဖို့ နိုးကြားကတ်ပါဖိ။ ယင်းပိုင်မဟုတ်ဘဲ အလွမ်းရှည်ချင်ကတ်တေဆိုကေ အကျွန်က အလွမ်းကဗျာချေတပုဒ်ရွီးစပ်ကြည့်ပါမေ။
