ဝေဖန်ရေးကိုဆရာတင် ညီညွတ်ရေးကို အသက်တမျှချစ်ခင်ပါ။ ဗိုလ်ရာဇာပြောခရေစကားဖြစ်ရေလို့ ဆရာပုဏ္ဏားဇူးဝေက လက်ဆောက်ပီးလိုက်ပြီး ဗိုလ်ရာဇာအကြောင်းပပါးချေပြောပြပါရေ။ ယေဇူးနန့် ရခိုင့်လွတ်လပ်ရေးစာစောင်သည် ရခိုင်စာပီဖေါ်ထုတ်ရေးနှင့် ရခိုင်စာပီ“စံ” ဖြစ်ပေါ်ရေးကို ဦးတည်နီရေစာစောင်လို့ ကျနော်နားလည်ထားရေအတွက်နန့်“ရွတ်”ဆိုရေဝေါဟာရကို စာပီဝါသနာသျှင်တိ ပါဝင်ဆွေးနွေးကတ်ဖို့ အထူးပြောကြားယင်း ကျနော်ကိုယ်တိုင် ဥာဏ်မီသလောက် တစိချေဆွေးနွေးချင်ပါရေ။ နောက်တချက် အထူးပြောလိုစွာက “ရွတ်”ဆိုရေဝေါဟာရကို ဆွေးနွေးစွာမှာ အယ်ဒီတာနန့်ပတ်သက်နီရေအတွက်နန့် အယ်ဒီတာကိုလည်း မိတ်ဖက်ဆောင်ရေ ဆွေးနွေးမှုတိပါရေအတွက်ကြောင့် အယ်ဒီတာကို တိုက်ခိုက်နီစွာလို့ မမြင်ကတ်ဖို့လည်းပြောချင်ပါရေ။
ပုဏ္ဏားကျွန်းဇူးဝေရီးရေ“အနာဂတ်စိန်ခေါ်သံနှင့်အခြားကဗျာများ” စာအုပ်မှာ လွတ်ဆိုစွာကို “ရွတ်”လို့ရီးထားစွာကို သတိထားမိပါရေ။ နောက်“ရခိုင့်ရွတ်လပ်ရေးစာစောင်”မှာတွိရပါရေ။ အေကိစ္စအတွက် ကျနော်လည်း တဖက်မှာ လက်လှမ်းမီရာ လေ့လာလို့ဟိပါရေ။ ဆိုကေ ကျနော့်ဆောင်းပါးအမှတ်(၂)မှာ“လွတ်”ကို “ရွတ်”လို့ ရခိုင့်ရွတ်လပ်ရေးစာစောင် အယ်ဒီတာက ပြောင်းထားစွာကိုတွိရပါရေ။ ဆိုကေ ငယ်ထိပ်ကိုကျလို့ ဝေဖန်စွာမဟုတ်ဆိုစွာကို ရဲဝံ့စွာပြောရဲပါရေ။ ရခိုင်စာပီဖော်ထုတ်ရေးထက် ရခိုင်စာပီစံဖြစ်ရေးကို ရည်ရွယ်စွာပါ။ ကျနော့်အမြင်က “ကိုယ်သိထားရေအမှန်တရားက ဇာလောက်မှန်ကန်ပါလဲ” ဆိုစွာပါ။ အေစွာ တော်လှန်ရေးမှာဘင်ဖြစ်ဖြစ်၊ စာပီနန့်ပတ်သက်လို့ဖြစ်ဖြစ် ကကောင်းအရေးကြီးပါရေ။ အချို့ခေါင်းဆောင်တိကို ကျနော်တွိဖူးပါရေ ကိုယ်သိထားရေ အမှန်တရားကို ဖက်တွယ်ပနာနီကတ်စွာကို။ ငါရို့အမျိုးသားရေးကို ရှိရှုပနာလုပ်ကတ်တေလူတိ အေအတွေးတိမဟိဖို့ ကကောင်းအရေးကြီးပါရေ။ “ငါသိထားရေအမှန်တရားက ဇာလောက်ခိုင်မာပြီး မှန်ကန်လို့လဲ”ဆိုရေအတွေးတိ လိုအပ်ဖို့ထင်စွာပါ။ ဆက်စပ်နီလို့ ဆိပ်ကေ(တဖေ့ချေ)ဆွဲကြည့်ခြင်းဖြစ်ပါရေ။
အေပိုင်ဗျာယ် ခေတ်သစ်အခြေအနေမာ ရခိုင်စာပီဖရိုဖရဲ ဖြစ်နီလို့“စံ”အဖြစ်မဟိစွာ မျိုးဆက်(၆)ဆက်ခန့်ဟိပါဗျာယ်။ ရခိုင်စာပီမဟိစွာမဟုတ်နန်း ရခိုင်စာပီ“စံ”မဟိစွာပါ။ ရခိုင်စာပီ စံ ဖြစ်ပေါ်ရေးကို ပြည်ထဲမှာလည်း ပုံဖော်နီကတ်စွာတွိရပါရေ။ ကိုယ်တတ်နိုင်ရာ လုပ်နီကတ်ပါရေ၊ ဆရာမောင်ဗသိန်းကတော့ခါ ရခိုင်စာပီညီလာခံတောင် လုပ်သင့်ရေလို့အကြံပီးဖူးပါရေ။ အေကိစ္စကို ကျနော်သဘောကျပါရေ။ ကာလတခုမှာ လုပ်ကတ်ဖို့အတွက် ကနိန့်အချိန်ကစလို့ တဖက်တလမ်းက ဘာသာဗေဒတိ လေ့လာနိန်ရေ ပညာတတ်တိ လေ့လာဆည်ပူးပနာ သုတေသနလုပ်သင့်ပါရေ။ ယင်းပိုင် စာပီနန့်ပတ်သက်လို့ ဆွေးနွေးခြင်းရေ ရခိုင်စာပီစံဖြစ်ပေါ်ရေးအတွက် အများကြီး အထောက်အကူ ဖြစ်ဖို့ဆိုစွာကိုတော့ခါ ပြောရဲပါရေ။ အေစွာက ရခိုင်စာပီညီလာခံ မဖြစ်ပေါ်မှီ တတ်နိုင်ရာ လုပ်သင့်ရေဆိုစွာပြောချင်စွာပါ။
နောက်တချက်က ကိုယ်ဆုပ်ကိုင်ထားရေ ဝေါဟာရကို စာရီးရေလူကတင်ပြရာမှာ အယ်ဒီတာအနီနန့် အယ်ဒီတာအယူအဆအတိုင်း မပြင်ဖို့အရေးကြီးပါရေ။ ဥပမာ ကျနော့်အနီနန့်“လွတ်” ဆိုရေ ဝေါဟာရကိုသုံးစွာကို အယ်ဒီတာက“ရွတ်”လို့ပြောင်းရေကိစ္စမျိုးပါ။ အမှန်က အယ်ဒီတာပိုင်ဆိုင်ရေ စာမျက်နှာဖြစ်တေ အယ်ဒီတာ့အာဘော်က အယ်ဒီတာ၏ အယူအဆအမြင်ကို သုံးသပ်ခွင့်ဟိရေလို့ ကျနော်လေ့လာဖူးပါရေ။ မဟုတ်ကေ အယ်ဒီတာကိုယ်တိုင် သီးခြားဆောင်းပါး တပုဒ်ရီးပနာ တင်ပြခွင့်ဟိရေလို့ဆိုပါရေ။ နောက်တချက်က ဆောင်းပါး၏အောက်မှာ အယ်ဒီတာမှတ်ချက်အဖြစ် ရီးခွင့်ဟိပါရေ။ စာရီးသူနန့် အယ်ဒီတာအကြားမှာ သမိုင်းကြောင်းရီးရေအခါ အကြောင်းအရာပိုင်း ကွဲလွဲမှုနန့် သက္ကရာဇ်ကွဲလွဲမှုတိ ဟိကေတောင်မှ အယ်ဒီတာတယောက်အနီနန့် မပြောင်းသင့်ပါ။ အယ်ဒီတာမှတ်ချက် အဖြစ်သာ ဖော်ပြသင့်ပါရေ။ ထို့အတူ ဖွဲ့နွဲ့မှုအပိုင်းကိုလည်း ကိုမြတ်နိုးရေအတိုင်း မလုပ်သင့်ပါ။ ပြန်ဆက်ပနာပြောရကေ အယ်ဒီတာသိထားရေ အကြောင်းအရာနန့် သက္ကရာဇ်ဆိုစွာ စာရီးရေသူနန့် မကိုက်ညီရေအတွက်နန့် စာရီးရေလူမှားရေ (သို့မဟုတ်) အယ်ဒီတာမှားရေလို့ ပြောလို့မရပါသီး။ သူရို့နှစ်ယောက်ထဲက သိထားရေ ခိုင်မာရေ သုတေသနပြုချက်နန့် တင်ပြလာကေ စာပီပညာသျှင်ရို့၊ စာပီဝါသနာသျှင်ရို့၊ လက်ခံလားဖို့ရာမနား။ ခိုင်ခိုင်မာမာတင်ပြနိုင်ရေ အမှန်တရားသာ အဂင့်အမှန်တရားလို့ ပြောရဖို့လားမသိဗျာယ်။ လွတ်နန့်ရွတ်ဝေါဟာကိစ္စကို ကျနော်လည်းစိတ်ဝင်စားပါရေ။ ကျနော်လက်လှမ်းမီရာ၊ ဥာဏ်မီရာ တင်ပြဆွေးနွေးချင်ပါရေ။ နောင်တွိကေလည်း တင်ပြလားပါမေ။ ဆရာ မောင်ဗသိန်းက “ရွတ်”ဆိုရေဝေါဟာရက“လွတ်”ကို ပြောင်းလားစွာလို့ တင်ပြဖူးပါရေ။ ဆရာမောင်ဗသိန်း သုတေသနပြုချက်အရ အချို့တောရွာတိမှာ“ရွတ်”ဆိုရေဝေါဟာရကို သုံးစွဲတုန်းသီးလို့ပြောပါရေ။ ဆိုကေ “ရွတ်”က “လွတ်”ကိုပြောင်းရွှိလားခြင်း သို့မဟုတ် ရွတ်ဟူသောဝေါဟာရရေ(ဒေသိယ)စကားသာဖြစ်တေဆိုစွာကို ကနိန့်အချိန်အထိ ပြည်တွင်းမှာလည်း ခိုင်ခိုင်မာမာမချပြနိုင်သီးပါ။ မြောက်ဦးခေတ် ဝါဂါပျံ(ဥက္ကာပျံ)ရို့ နန်းတွင်းစာဆို မိညိုရို့အစ ဆရာအောင်ထွန်းလှရို့ တန်ခိုးဆရာကြီး ဆရာထွန်းရို့အလယ်၊ ၊ဓညမြေ၊ ဓညဦး၊ သျှင်အုံး၊ စစ်တွေစောနောင်ရို့အဆုံး သူရို့ရီးသားရေ ကဗျာတိကို ကျနော်လက်လှမ်းမှီသလောက် ဖတ်ကြည့်ပါရေ။ “လွတ်”ဆိုရေ ဝေါဟာရကိုရာ သုံးစွဲစွာကိုတွိရယင့်။ ယေဇူးနန့် ကျောက်စာ၊ စာပီတိကို လေ့လာပနာ သုတေသီရို့၊ ဘာသာဗေဒပညာသျှင်ရို့ ခိုင်ခိုင်မာမာတင်ပြကတ်ကေ ရခိုင်စာပီအတွက် အကျိုးဟိဖို့ရာ။ ရွတ်ဆိုရေ စကားကိုတင်ပြကတ်တေ စာပီသမားတိကိုလည်း ကျေးဇူးတင်ရပါဖို့။ ရခိုင်စာပီစံဖြစ်ပေါ်ရေးအတွက် အရေးကြီးပိုင် ဖရိုဖရဲဖြစ်နိန်ရေ ရခိုင်စာပီအတွက်လည်း ကကောင်းတန်ဖိုးဟိရေလို့ အလီးအနက်ပြောလိုပါရေ။
ချုပ်ပနာပြောရကေ “ရွတ်..နန့် ..လွတ်”ဆိုရေ ဝေါဟာရကိစ္စမှာ “ရွတ်”ကိုစံအဖြစ်သုံးခကတ်ပြီး “လွတ်”ဆုိုစွာ ရွက်ကပြောင်းရွိလာရေလို့ ခိုင်ခိုင်မာမာ ချပြကေလေ့သော့ “ရွတ်”ဟူသည် ခေတ်ဟောင်းအသုံးအနှုန်း(သို့မဟုတ်) ရခိုင်ဂန္တဝင်စာပီဝေဟာရအဖြစ်သာ ဟိလီဖို့လို့ ကျနော်ထင်ပါရေ။ ဇာဖြစ်လို့လည်းဆိုကေ ကနိန့်အချိန်မှာ ရွတ်ထက် လွတ်ကို ရခိုင်တပြည်လုံး အများသုံးနီကတ်လို့ဖြစ်ပါရေ။ စာဆိုလည်း စကားကို အခြီခံစွာမဟုတ်ပါလား။ ဆရာမောင်ဗသိန်းရေ ကျနော့်ဆောင်းပါးကို ဖတ်ရကေ “မိတ်ဖက်ငြင်းခုံမှုအသွင်ကို ဖော်ဆောင်ရေ အားထုတ်ချက်ဖြစ်တေလို့ ဆရာပြောလီဖို့လို့ ထင်မိပါရေ။ ယေဒါလေ့ ဆရာက “ပြောင်းရွိလာခြင်း”လို့မသုံး “ဖောက်ပြန်နီရေစကား” လို့သုံးစွာကို သတိထားမိပါရေ။
ဒေနိန့်အချိန်မှာ တိုက်ပွဲကာလဖြစ်ရေအတွက်နန့် အများနားလည်အောင် ကျနော်ရို့တိ ဆောင်းပါး၊ ကဗျာတိရီးကတ်ပါရေ။ ယင်းပိုင်ရီးစွာကို လူမျိုးခြားကို အထင်ကြီးပြီးရီးစွာ မဟုတ်ဆိုစွာကို ပြောချင်ပါရေ။ ဆိုကေ ရခိုင်စာပီဖျက်ဆီးနီရေလူလို့ ကင်ပွန်းတတ်စွာ စစောစစီးမတတ်ကတ်ဖို့ ပြောချင်ပါရေ။ ရခိုင်စာပီဖျက်ဆီးရေလို့ စွပ်စွဲစွာ ဇာအခြီခံနန့် စွပ်စွဲကတ်တေလေ့မသိ၊ နောက်တချက်က ရခိုင်စာပီ ဖော်ထုတ်ရေးလို့ ပြောပနာ ကရောင်ကထောင်ရီးသားခြင်းရေ ရခိုင်စာပီကို ဖျက်ဆီးပိုင်ဖြစ်လားဖို့ဆိုစွာကိုလည်း သတိထားကတ်ပါ။ ရခိုင်စာပီစံအဖြစ် ဖေါ်ထုတ်ကတ်တေအခါ ကျနော်ရို့ ပါဝင်ဆောင်ရွက်ကတ်လာဆိုစွာကို စောင့်ကြည့်ပြီးမှရာ ပြောကတ်စီချင်ပါရေ။ သေချာစွာက ရခိုင်စာပီဖြစ်ပေါ်ရေးလုပ်တေအခါ ဘာသာဗေဒ ကျွမ်းကျင်ရေ ပညာသျှင်တိ ကကောင်းလိုအပ်ပါရေ။ ဘာသာဗေဒ ကျွမ်းကျင်မှုမဟိဘဲနန့် ဗမာနန့်မတူကေပြီးဗျာယ်ဆိုပနာ ကရောင်ကထောင်လုပ်လို့ မရဆိုစွာပြောချင်ပါရေ။ ယေဒါလေ့သော့ စာပီဝါသနာသျှင်ရို့ဆိုလိုစွာကို လက်ခံပါရေ။ “စံ”စာပီတခုဖြစ်ပေါ်ရေးအတွက် ပြောင်းရွိလာရေစကားလုံးတိကို ထိန်းပီးဖို့ တမျိုးသားလုံးက စံအဖြစ်သတ်မှတ်ရေ အဘိဓာန်ကျမ်းရို့၊သဒ္ဒါကျမ်းရို့ ပြုစုရခန်းသီး။ ကိုယ့်ဒေသက ပြောရေစကားနန့်မတူဆိုပနာ အခြားဒေသစကားကို ရခိုင်စကားမဟုတ်ဆိုစွာလည်း ပပျောက်လားဖို့။ မာန်အောင်ကျွန်းက တောရွာအချို့မှာ ပြောကတ်တေ “မှင်”ဆိုစွာစကားရေ ဗမာစကားမဟုတ်ပါ။ မှင်..မှင် ဆိုစွာ ဇာလဲ့ ဇာချင့်လဲ့လို့ စစ်တွေလီသံနန့် ပြောရပါဖို့။ ယင်းစကားကို နီရာတိုင်းမှာ သုံးစွာမဟုတ်ပါ။ ဥပမာ “မြွှီတကောင် တွိခရေလို့လာပြောကေ မှင် မှင်လို့ ပြန်မီးကတ်ပါရေ။ ယင်းပိုင်ကွဲလွဲချက်တိကို အဘိဓာန်ဟိကေ အဘိဓာန်ကယှင်းလားပါဖို့ရာ။ ရွတ်နန့်လွတ်ပတ်သက်လို့(၁၉၆၂-၃)ဝန်းကျင်က ရွင့်ရွတ်ကိုသုံးစွာကဗျာနန့် လွင့်လွတ်ကို သုံးရေကဗျာနှစ်ပုဒ်ကို တွိဖူးပါရေ။ အသျှင်သီရိကဗျာမှာ “ပင်ခြီရင်းကို လီနန့်ရွင့်လို့ သုံးထားစွာပိုင်၊ မပိုးညို(ဒိုင်နာစပူ)က လွင့်လွင့်ရွက်ချပ်အလီလီ” ဆိုပနာ သုံးထားစွာကို တွိရပါရေ။ ဆိုကေ ငါရို့တိ ရခိုင့်ရွတ်လပ်ရေးစာစောင်မှာ ရခိုင်စာပီစံဖြစ်ပေါ်ရေးအတွက် မိတ်ဖက်ဆောင်ရေ ဝေဖန်ရေး၊ ဆွေးနွေးရေ ဆောင်းပါးတိ ရီးကတ်ပါမေ။ အေစွာ အမိုင်းပါထော ရခိုင်စာပီဆိုစွာဟိပြီးသားပါ။ ရခိုင်စာပီစံမဟိသီးဆိုစွာကို ပြောချင်စွာပါ။ ဖောင်ကွဲဝါးရေ ဖရိုဖရဲဖြစ်စွာပိုင် ဖရိုဖရဲဖြစ်နီရေဝါးတိကို စုစည်းပနာ လှော်ခတ်ကတ်မေလို့။ ။
ခိုင်လင်း (မေဃ၀တီ)
